الى هوبة..

صديقة عمرى واختى الحبيبة اللى شجعتنى انى اعمل البلوج دا..دا كان اقتراح من كام قرن كدة وعلى ما اتنفذ بقة!

بهديلك خلطة المحشي بكل تفاصيلها_اللذيذة جدا_وضرورى تجربيها..وادعيلي ;)

المحشي..

مين مبيحبوش؟
دى طريقته لكل انواعه سواء كرنب او ورق عنب او كوسة او بتنجان او البصل..والاخير دا حكااااااية..هتدمنوه لو جربتوه

الخلطة بتبقى واحدة فى كل الانواع وطريقتها كالتالى ..بالتفصيل المملللللللللل اوى ومحدش يزهق
طبعا بعد تجارب كتير وصلت للخلطة المفترية دى..دى ريحتها بدون مبالغة بتوصل للأسانسير..ان مكانش بير السلم :D

دى مقادير حلة محشي كبيرة تكفى خمس افراد:

اولا بنسبك الصلصة..نفرم كيلو ونص طماطم فى الخلاط ومعاهم قرن فلفل حار وقرن فلفل رومى وعليهم تلات او اربع معالق صلصة كبار ونجيب حلة نقدح فيها شوية زيت ذرة على سمنة او سمنة بس او زيت بس حسب ماتفضلى ولما الزيت يسخن (لازم يسخن كويس عشان الصلصة متكلكعش بعد ماتستوى وبرضه نفس التكة دى طبقيها وانتى بتعملى المكرونة عشان تبقى صلصتها مظبوطة)_المهم لما الزيت يسخن نطش الطماطم.

البهارات بقة ودى اهم حاجة فى حدوتة المحشي كلها:
حوالى معلقتين صغيرين او تلاتة ملح_رشة فلفل اسود_رشة حبهان _ رشة كمون_رشة كسبرة ناشفة_رشة نعناع ناشف_رشة قرفة_رشة زنجبيل مطحون_ورشة شطة لو بتحبي المحشى مشطشط.

كل دا يتحط على الصلصة وهى بتتسبك..مدة التسبيك بتبقى حوالى ربع او تلت ساعة..يعنى لحد ماتلاقيها اتركزت بس بلاش تتركز اوى..
طبعا لسة محطيناش البصل..ليييه؟ انا كنت بحط البصل فى الاول خالص واشوحه فى السمنه قبل ما احط الصلصة..لقيت ان الموضوع دا بيضيع طعمه وافضل حاجة هو انه يتحط فى الاخر خالص..نى ف نى يعنى
هنجيب حوالى خمس بصلات متوسطة نفرمهم كويس فى الكبة ونحطهم على جنب لحد ما نجمع الخلطة على بعضها..

الخضرة بقة: ربطتين كسبرة على ربطتين شبت على ربطتين بقدونس وممكن شوية نعناع اخضر (طبعا لو الربطة كبيرة وتملى العين كدة يبقى كفاية ربطة من كل نوع)..كل دا برضه يتفرم فى الكبة بس بشرط ان الكبة متكونش بتفرم جامد لان لو الخضرة اتفرمت جامد بتطلع عصارة و بتمرر وطعمها بيروح..فلو موضوع الكبة دا مش متوفر يبقى تتقطع بالسكينة صغير اوى..

اخر حاجة الرز: حوالى ست او سبع كوبايات رز مغسولين ومتصفيين كويس اوى (مهم ميبقاش فيهم مية)
التجميع فى الاخر: بنحط الرز على الخضرة الاول ونقلب عشان نضمن ان الخضرة تتوزع كويس فى الرز ومتكلكعش لما نيجي نحط الصلصة وبعدين نضيف البصل المفروم ثم الصلصة المتسبكة ونقلب كويس اوى..
بعد ماتقلبي دوقى الخلطة وشوفى ملحها لو ناقصة ملح ضيفي شوية ..

الفيلم دا كله بياخدله من نص ساعة لساعة على حسب سرعتك وطبعا اول مرة عمايل مبتبقاش زى المرة العشرين! (بس فى كل الاحوال هو ممتع فى عمايله..وطبعا فى اكله!)

هنحشي بالخلط دى ايييه؟؟
حجات كتير اوى..اطعمها الكرنب (ملك المحاشي) وورق العنب والكوسة والبتنجان واللى تحفة بقى بجد البصل..وله طريقة سهلة خالص فى حشوه هقولها اهو..بس الاول نقول الكرنب نظامه ايه:
بنجيب كرنباية حلوة كدة ومورقة ونراعى واحنا بننقيها ميبقاش فيها عروق كتير ودا بيبقى طبعا حسب الموسم..
بنجيب سكينة حامية ونقطع حوالين عنق الكرنباية داير مايدور بحيث يبقى العنق كله سايب  ونبتدى بالراحة نشيل ورق الكرنب من على جوانب العنق ورقة بورقة لحد مانخلص الكرنباية..الموضوع دا بيبقى صعب شوية فى اول مرة بس بعد كدة بتتعودى..
نيجي بقة للورق نفسه..فى ناس بتسلقه بحاله لكن الافضل انه يتقطع الاول وبعدين يتسلق عشان عملية الحشو بعد كدة تبقى سهلة..
بنشيل العرق الكبير اللى فى نص الورقة هنلاقيها اتقسمت نصين..النصين يتقطع كل نص فيها بحجم كف الايد او اصغر شوية..وهكذا لحد مانخلص الورق كله..يراعى انك ترصي الورق فوق بعضه عشان يبقى سهل وانتى بتسلقيه ولما تيجي تحشى ميتبهدلش..
نغلى حلة مية كبيرة ونحط فيها ملح وكمون..لما تغلى نسقط فيها ورق الكرنب المتقطع..نسيب الورق يتسلق من دقيق لدقيقتين مش اكتر عشان الورق ميتهريش..لما نخلص الكمية نحطها فى مصفاة لحد ما نبدأ لف..
اللف بقة وما ادراك ما اللف..انا واحدة من الناس مكنتش بعرف الف ولا عمرى اتخيل انى هعرف بس كل حاجة بالتكرار مبيبقاش فى اسهل منها..
لو اول مرة تلفى يبقى ابداى بانك تجيبي طبق مسطح كبير وتحطى عليه ورقة الكرنب وتجيبي معلقة صغيرة تعايري بيها ..يعنى تحطى معلقة خلطة على الورقة وتلفى الورقة على الخلطة هتبقى فى الاخر صوباع محشي! طبعا اول صابع مثلا هتلاقيه فاكك من بعضه التانى هيبتدى يمسك نفسه شوية التالت الخلطة هتقع منه من الجوانب..كل دا عادى..مرة فى مرة هتظبط..
الحلة اللى هترصى فيها المحشي بطنيها بطرنشات طماطم وجزر عشان الكنب ميتحرقش وهو بيستوى..

خلصنا لف..نيجي بقة على السوى
المحشي بيتسوى بشوربة لو شوربة فراخ ماشي لو شوربة لحمة ماشي لو شوربة بط بقة بيبقى روعة..بتكون الشوربة بتغلى عندنا ونبتدى نحط بالكبشة او الكرنيب بتاع الشوربة واحدة بواحدة لحد ماتوصل الشوربة لقبل اول صف محشي يعنى متغطيهوش عشان ميعجنش..نغطى ونسيب الحلة على نار عالية لحد مايغلى..نسيبه يغلى حوالى خمس دقايق وبعدين نهدى النار خالص ونسيبه يستوى لمدة ساعة.
المحشي طعمه مش بيبان غير لما يبرد شوية يعنى نسيبه يهدى شوية وبعدين نفرغه فى السرفيس او طبق التقديم..الكرنب عشان تفرغيه بتشكشكى الحلة او تهزيها جامد وتكبي عالطبق عدل..

انا بعمل حرجة مجرمة بعد ما بغرفه ودى طبعا لا ينصح بيها الى خايفين على الكولسترول او بيعملوا رجيم بس ممكن تعملواها مرة على سبيل التجربة! بعد ما بحمر الفراخ او البط فى خليط من السمنة والزيت باخد الزيت اللى طالع من التحمير دا وبرشه على وش الطبق او على وش حلة المحشي نفسها..بيدى طعم بجد لا يوصف مع احساس خفى بالذنب لما باجى اكل وهاجس ان حد هييجي يقبض عليا بالجريمة دى! اللى بيقلل احساس بالذنب شوية انى ببقى حاطة زيت او سمنة قليلة فى خلطة المحشي نفسها..بس برضه انا بحذر اهو!

كدة يبقى خلصنا محشي الكرنب وبالهنا والشفا..
محشي ورق العنب نفس الطريقة بالظبط بس فى الاخر بعد ما بيستوى بنعصر لمونة محترمة ع الحلة ورشة زيت زيتون..
محشي الكوسة والبتنجان برضه نفس الطريقة بس بعد تقوير الكوسة والبتنجان لازم نشوحهم الأول بسيط فى زيت او سمنة لان دا بيخلى طعمهم تحفة بعد السوا..

محشي البصل بقة و تكته الوحيدة فى فكرة ازاى بتحشي البصلة والطريقة كالتالى:
بنجيب ست سبع بصلات متوسطين يكونوا مدورين وشكلهم مش بيضاوى لان البصلة البيضاوية بتكون مقسومة لبصلتين صغيرين ودى متنفعش تتحشي..
بنقشر البصلة وبنشقها بالسكينة بالطول لحد نصها بالظبط عشان لما تتسلق الطبقان اللى جواها تفصل من بعضها وناخدها نحشيها..
بنكون مجهزين مية مغلية بملح وكمون ونسقط فيها البصل ونسيبه يغلى لمدة عشر دقايق تقريبا لو احد مانلاقي البصله اتفتحت من نفسها بس ناخد بالنا ان البصلة ماتتسلقش جامد عشان ماتتهريش لان لو اتهرت يبقى صعب اوى تتحشي او تقريبا مش هاتتحشي اساسا..
مهم ان اول ما تحس البصلة فصلت من بعضها نطلعها على طول على مصفاه ويكونوا متفردين لان الحرارة نفسها بتسوى البصل بسرعة..
نبتدى نفك طبقات البصلة بحرص عشان ماتتقطعش وكل طبقة نحط فيها معلقة من خلطة المحشى ونلفها ..بيبقى شكله حلو اوى وكيوت كد وهو صغنن صغنن فى الحلة..كانه حبات لؤلؤ صغيرة :)  وبيستوى بنفس طريقة محشي الكرنب ودا فى رأيي أطعم نوع محشي ممكن تدوقوه..


انا عارفة ان انى مطولة فى الطريقة بس مش عاوزة تكة تفوت عشان كل تكة ليها دور فى الطعم..وبعدين دا محشي مش رز وشوربة يعنى تدخلى بيه ماراثون عزومة وانتى متطمنة ..عزومة عريس ماشي..تصالحى بيه جوزك لو زعلان (دا لو بيحب الاكل يعنى ولو الزعلة مش غميقة اوى)..المهم فى الاخر تدعولى..

وبالهنا والشفا :)

 مبحبش المقدمات وبحسها مربكة اكتر منها موضحة!

بس لازم اقول اى حاجة مش معقول هبدأ البلوج كدة بخلطة المحشي اللى وعدت هوبة بيها!

زمان مكنتش اعرف خالص انى غاوية طبخ بس اللى كنت متاكدة منه انى بحب اكل تيتة جدا ويمكن هى اللى علمتنى ادوق الاكل ازاى..كان اى حاجة ادوقها تقللى ايه رأيك؟ اقللها انتى حاطة نعناع؟ تقللى اه..وقرفة؟ اكيد..طعمها حلو اوى!
وبما ان تيتة هى الشيف الكبير فى العيلة واكلها هو اطعم اكل دقته ف حياتى بلا منازع فحاولت بعد مااتجوزت انى اطبق معاييرها والحجات اللى كانت بتعملها عشان اقرب بس من الطعم اللى حبيته ف اكلها..

اللى ليه الفضل بقة فى تظبيطي كتير فى موضوع الطعم دا هو زوجى الحبيب..فبالرغم من انه مش اكيل نهائى لكن لما ياكل حاجة ممكن يطلعلى بالظبط العيب اللى فيها..مش انها ناقصة ملح او فلفل..لكن مثلا الاقيه يقللى صينيه البطاطس دى كانت محتاجة تنشف كمان شوية فى الفرن..او صينيه السمك دى استوت زيادة..والغريب انى كنت ببقى حاسة بنفس الحاجة بس توصيفها بالظبط هو اللى كنت ببقى عاوزة اسمعه..ومرة ف مرة ابتدت المواضيع تظبط..وبدأت افنن بقة من عندى..

القاعدة ان كل ماحبيت اكلة اوى كل ماحسيت بيها اوى وطورتها لتصبح افضل مايكون..والعكس بالعكس..يعنى انا مبحبش الحلويات الا اصناف بسيطة وفى اوقات معينة..عشان كدة انا مش شاطرة فى الحلويات زى الطبيخ لانى مليش فى اكلها..



لكل اللى بيحب الأكل او بيحب يطبخ او نفسه يتعلم يطبخ دى مجموعة من وصفاتى منها وصفات بطبقها زى ماهى بالظبط بدون تغيير ومنها وصفات غيرت فيها جزئيا اوكليا عشان تبقى اطعم..

وابقوا جربوا ومش هتندموا :)

وحشنى اكلك يا تيتة!